माजी राज्यमंत्री ॲड. सुलेखाताई कुंभारे यांचा महामेट्रोकडे यशस्वी पाठपुरावा; कामाला वेग देण्याचे प्रशासनाचे आदेश
श्री. सुनील उत्तमराव साळवे
(9637661378 /9527190782)
मुख्य संपादक
Vansh News Digital Web portal online.
कामठी/नागपुर : 22 एप्रिल 2026.
नागपुर जिल्ह्यातील कामठी शहराचा चेहरामोहरा बदलणाऱ्या मेट्रो रेल्वे प्रकल्पात आता एक जागतिक दर्जाचे आकर्षण जोडले जाणार आहे. जागतिक शांततेचे प्रतीक असलेल्या ड्रॅगन पॅलेस टेम्पलच्या धर्तीवरच आता मेट्रो स्टेशनची उभारणी केली जाणार असून, या महत्त्वाकांक्षी प्रकल्पासाठी माजी राज्यमंत्री ॲड. सुलेखाताई कुंभारे यांनी विशेष पुढाकार घेतला आहे. या स्टेशनला ‘ड्रॅगन पॅलेस’ असे नाव देऊन तिथे ड्रॅगन पॅलेस टेम्पलच्या वास्तुशिल्पाची हुबेहूब प्रतिकृती साकारली जाणार आहे.
2018 मध्ये केंद्रीय मंत्री नितीन गडकरी यांनी धम्मचक्र प्रवर्तन दिनानिमित्त ड्रॅगन पॅलेस टेम्पल येथे आयोजित कार्यक्रमात ‘ड्रॅगन पॅलेस टेम्पल’ मेट्रो स्टेशन आता एका आगळ्यावेगळ्या रूपात साकारणार असल्याची संकल्पना मांडली होती. त्याच धर्तीवर ॲड. सुलेखाताईं कुंभारे पाठपुरावा करीत आहेत.
भाविकांच्या सोयीसाठी ॲड.सुलेखाताईं कुंभारे यांचा आग्रही निर्धार
ड्रॅगन पॅलेस टेम्पल येथे दरवर्षी 5 लाखांहून अधिक देशी-विदेशी भाविक आणि पर्यटक भेट देतात. या मोठ्या संख्येला केंद्रस्थानी ठेवून, येथील मेट्रो स्टेशन केवळ प्रवासाचे साधन न राहता ते एक पर्यटन स्थळ म्हणून विकसित व्हावे, असा मानस ॲड.सुलेखाताई कुंभारे यांनी व्यक्त केला होता. त्यांच्याच निरंतर पाठपुराव्यामुळे आता ऑटोमोटिव्ह चौक ते कन्हान या मार्गावरील या विशेष स्टेशनच्या कामाला विशेष गती प्राप्त झाली आहे.
महामेट्रो कार्यालयात तातडीची बैठक
नुकतीच ॲड. सुलेखाताई कुंभारे यांनी महामेट्रोच्या मुख्य कार्यालयात महामेट्रोचे व्यवस्थापकीय संचालक श्रावण हर्डीकर यांची भेट घेऊन कामाच्या प्रगतीचा आढावा घेतला. या बैठकीत त्यांनी खालील प्रमुख मागण्यांवर भर दिला.
प्रतिकृतीचे बांधकाम: मेट्रो स्टेशनचे स्ट्रक्चर हे ड्रॅगन पॅलेस टेम्पलच्या शैलीतच असावे, जेणेकरून शहराच्या सांस्कृतिक वैभवात भर पडेल.
कामात वेग: कन्हानपर्यंतच्या मेट्रो मार्गाचे काम युद्धपातळीवर पूर्ण करून जनतेला दिलासा द्यावा.
भव्य स्टेशनची उभारणी: 5 लाख भाविकांची ये-जा सुलभ व्हावी यासाठी येथे मोठे आणि सुसज्ज स्टेशन उभारण्यात यावे.
कामठीच्या विकासाला नवी दिशा
माजी राज्यमंत्री ॲड. सुलेखाताई कुंभारे यांच्या या प्रयत्नांमुळे कामठीतील मेट्रो प्रकल्प आता एका नवीन उंचीवर पोहोचणार आहे. महामेट्रो प्रशासनाने त्यांच्या मागण्यांची दखल घेत तांत्रिक प्रक्रिया जलद करण्याचे आणि स्टेशनच्या कामाला लवकरच प्रत्यक्ष सुरुवात करण्याचे आश्वासन दिले आहे. या यशामुळे कामठी परिसरात आनंदाचे वातावरण असून, पर्यटनाच्या माध्यमातून स्थानिक रोजगारालाही मोठी उभारी मिळणार आहे.
”ड्रॅगन पॅलेस मेट्रो स्टेशन हे कामठीच्या सौंदर्यात आणि सोयीत भर टाकणारे ठरेल. या स्टेशनच्या माध्यमातून भाविकांना जागतिक दर्जाच्या सुविधा मिळाव्यात, यासाठी आमचा पाठपुरावा निरंतर सुरू आहे आणि लवकरच हे काम पूर्णत्वास जाईल.”
— ॲड. सुलेखाताई कुंभारे
काल बुधवार दिनांक 22 एप्रिल रोजी संपन्न झालेल्या या बैठकीत ॲड सुलेखाताई कुंभारे आणि महामेट्रोचे व्यवस्थापकीय संचालक श्रावण हर्डीकर यांच्या सह प्रोजेक्ट प्रमुख राजेश त्यागी, आर्कीटेक्ट हबीब खान उपस्थित होते.
